الدمعة اللي على الخدين منثوره
اشوفها حرّقت جفنٍ مشاكيها
به عبرة داخل المعلوق محشوره
عبرة مصايب كفان الله بلاويها
تحرق ارموش العيون إتحد منظوره
عبرة إدموع الحزن تدمي أشافيها
في يوم الاثنين جانا العلم وسبوره
عبر الهواتف تناقلنا خوافيها
في ثالث أيام ذي القعده ومخبوره
جتنا فجيعه عقب بانت مآسيها
جانا الخبر مع صلاة الظهر وظهوره
حادث أليم إلبنات الرس طاويها
كل بدوره ركض كلٍ ومقدوره
عجز طبيب المشافي لايداويها
ياالله تشفي المريض وتجبر اكسوره
وترحم بناتٍ توفن يوم تدعيها
ترفع عزانا بدمع العين مخشوره
الله يحْسِن عزا من إنفجع فيها
امر مقدر عجز بالطب دكتوره
ماينفع الطب لابانت دواعيها
يالله عسى اقبورهن بالسيل ممطوره
همال رعاد تال الليل يسقيها
ينبت على اقبورهن الورد وزهوره
في جنة الخلد في عالي معاليها
الحي لو طالت ايامه يجي دوره
يجيبه اللي عليم في تواليها
وصلاة ربي عدد ماطارت اطيوره
على نبيٍ ادروب الحق مبديها
.
.
للشاعر / ابراهيم بن محمد العطني
ليست هناك تعليقات:
إرسال تعليق