يامن عباده تحج البيت وتزوره
وتصوم فرضه وخمسٍ له تصليها
ياللي له النفس منهيّه وماموره
الكون بامرك تديره وانت واليها
بيدك رفعت السما والارض معموره
لك حكمة في جميع الخلق تجريها
واللوح محفوظ والاقدار مسطوره
والعبد ماله عن اللي كاتبٍ فيها
في يوم الاثنين حل الحزن واكدوره
خيم على الرس قاصيها ودانيها
يومٍ سواده طغى واضفى على نوره
وواد الرمه سال دمعٍ مع مجاريها
العَود والام والخفرات في دُوره
وشباب واطفال فجع الموت مدميها
ينعون زرعٍ ذبل في بادي اظهوره
وقبل حصاده تطاير مع ذواريها
بناتنا اللي سعن للعلم وابحوره
حازن وسام الشرف باسمى معانيها
مع طلعة الصبح قبل اتهاجر اطيوره
ومن يطلب الطايله نفسه يعنّيها
وقبل الشهاده وحفلٍ زان طابوره
مع فرحة الاهل والخلان تحييها
صارت شهادة وفاة بدم ممهوره
شهادةٍ ماأظن أحدٍ بناسيها
تبدل الحفل لاضحكه ولاصوره
وتغير اللبس صار الخام كاسيها
والمقبره صارت المسرح وجمهوره
حشدٍ من الخيّرين الله يجزيها
مايِسمع الصوت والعبرات محجوره
صلاة واذكار وادموعٍ تواسيها
كلٍ يبي له تعازي لاوصل دوره
البنت بنته وكن النار واطيها
ترى المصيبه ماهي لبيتين محصوره
بناتنا كلنا حضر وبواديها
ياالله ياجابر العثرات وكسوره
تجبر عزا اقلوبْ عانت فقد غاليها
عسى ( مها ) مع ( سميه ) اتصير محشوره
مع صفوة الخلق والجنه اتجازيها
وصلوا على من تنورنا بدستوره
نبينا معلم الامه وهاديها
للشاعر / سليمان محمد الرميح
ليست هناك تعليقات:
إرسال تعليق